|
TLG 2112 014 :: AMPHILOCHIUS :: Encomium sancti Basilii Magni [Sp.] AMPHILOCHIUS Scr. Eccl. Encomium sancti Basilii Magni [Sp.] fr. 22 Citation: (Line) | ||
| 1 | (μετὰ δὴ ταῦτα παρατιθέασιν Ἀμφιλοχίου τοῦ ἐξ Ἰκονίου λόγους ἐκ τοῦ πεποιημένου αὐτῷ Ἐγκωμίου εἰς τὸν μέγαν Βασίλειον, ἐν οἷς τὰ τοιαῦτα λέγεται·) Οἱ ἅγιοι οὐ προσδέονται τῶν διὰ γραμμάτων ἡμῶν ἐγκωμίων, ἐγγεγραμμένοι ἤδη τῷ βιβλίῳ τῶν ζώντων, ὧν ἡ δικαιοσύνη παρὰ τῷ Θεῷ πεφύλακται. ἡμεῖς δὲ χρῄζομεν τῶν διὰ μέλανος γραμμάτων ὅπως ὁ νοῦς | |
|---|---|---|
| 5 | ἡμῶν διαγράφῃ τὴν τούτων μνήμην εἰς κοινὴν ὠφέλειαν καὶ ὦμεν ἀκροαταὶ τούτων, ὅταν διὰ τῆς ἀναγνώσεως τῇ ἀκοῇ παραπέμπωμεν ὡς γὰρ ἐκ μεγάλου θησαυροῦ πρὸς οἰκονομίαν τὰς εὐεργεσίας λαμβάνομεν καὶ πληροῦμεν ἡμῶν τὰ ὑστερήματα ταῖς τούτων πολιτείαις (οὐ γὰρ πληροῦται ἀκοὴ δι’ ἐπιθυμίας ἔχουσα ἀκοῦσαι τὴν τούτων τελείωσιν). ἀλλ’ οὐ χρώμασι τοῖς πίναξι τὰ σαρκικὰ αὐτῶν πρόσωπα ἐπιμελὲς ἡμῖν ἐκτυποῦν ὅτι οὐ χρῄζομεν τούτων, ἀλλὰ τὴν τούτων ἄθλησιν ἐκμιμούμενοι | |
| 10 | καὶ τὰς ἀγαθὰς πράξεις δευτεροῦμεν καὶ τὴν πρὸς Θεὸν ἀγάπην διαγράφομεν καί ἐσμεν μιμηταὶ τῶν ἀγαθῶν πράξεων αὐτῶν, ἐντιθέντες τῇ γραφῇ τὰς τούτων μνήμας μετὰ θάνατον πρὸς τοὺς ἀκούοντας | |
| ὅπως γνῶσι τὴν ἐν κόσμῳ αὐτῶν ἀναστροφήν. | 61 | |