|
TLG 0013 032 :: HYMNI HOMERICI :: In Lunam HYMNI HOMERICI Hymn. In Lunam Citation: (Line) | ||
| t | Εἰς Σελήνην | |
|---|---|---|
| 1 | Μήνην ἀείδειν τανυσίπτερον ἔσπετε Μοῦσαι ἡδυεπεῖς κοῦραι Κρονίδεω Διὸς ἵστορες ᾠδῆς· ἧς ἄπο αἴγλη γαῖαν ἑλίσσεται οὐρανόδεικτος κρατὸς ἀπ’ ἀθανάτοιο, πολὺς δ’ ὑπὸ κόσμος ὄρωρεν | |
| 5 | αἴγλης λαμπούσης· στίλβει δέ τ’ ἀλάμπετος ἀὴρ χρυσέου ἀπὸ στεφάνου, ἀκτῖνες δ’ ἐνδιάονται, εὖτ’ ἂν ἀπ’ Ὠκεανοῖο λοεσσαμένη χρόα καλὸν | |
| εἵματα ἑσσαμένη τηλαυγέα δῖα Σελήνη ζευξαμένη πώλους ἐριαύχενας αἰγλήεντας | 90 | |
| 10 | ἐσσυμένως προτέρως’ ἐλάσῃ καλλίτριχας ἵππους ἑσπερίη διχόμηνος· ὅ τε πλήθει μέγας ὄγμος, λαμπρόταταί τ’ αὐγαὶ τότ’ ἀεξομένης τελέθουσιν οὐρανόθεν· τέκμωρ δὲ βροτοῖς καὶ σῆμα τέτυκται. τῇ ῥά ποτε Κρονίδης ἐμίγη φιλότητι καὶ εὐνῇ· | |
| 15 | ἡ δ’ ὑποκυσαμένη Πανδείην γείνατο κούρην ἐκπρεπὲς εἶδος ἔχουσαν ἐν ἀθανάτοισι θεοῖσι. Χαῖρε ἄνασσα θεὰ λευκώλενε δῖα Σελήνη πρόφρον ἐϋπλόκαμος· σέο δ’ ἀρχόμενος κλέα φωτῶν ᾄσομαι ἡμιθέων ὧν κλείους’ ἔργματ’ ἀοιδοὶ | |
| 20 | Μουσάων θεράποντες ἀπὸ στομάτων ἐροέντων. | 91 |